កាលពីថ្ងៃសៅរ៍ ទី២ ខែមីនា ឆ្នាំ២០១៩កន្លងទៅ យុវជនបឹងកេតអាយុក្រោម១៨ឆ្នាំ បានប្រកួតឈ្នះយុវជនព្រះខ័នរាជស្វាយរៀង ដោយលទ្ធផល ២-១ សងសឹកបានសម្រេចទៅនឹងបរាជ័យកាលជួបគ្នាក្នុងជើងទីមួយ ដែលបឹងកេតបរាជ័យ ៥-០ ។
លទ្ធផលកើតចេញពីការរកគ្រាប់បាល់នៅនាទី ១៤ ពេលដែលខ្សែការពាររបស់ព្រះខ័នរាជស្វាយរៀងបានធ្វើឱ្យបាល់ចូលទីខ្លួនឯងដោយអចេតនា នាំឱ្យបឹងកេត នាំមុខមុន ១-០។
នៅនាទី ២៧ កីឡាករលេខ ១៦ របស់ព្រះខ័នរាជស្វាយរៀង ក៏ស្វែងរកគ្រាប់បាល់តាមស្មើវិញ នាំឱ្យក្រុមទាំងពីរបញ្ចប់ លទ្ធផលវគ្គទីមួយ ១-១។
ចូលដល់វគ្គទីពីរ បន្ទាប់ពីមានការផ្លាស់ប្តូរសមាសភាពកីឡាកររបស់យើង យុវជន លី ស្មាអ៊ែល (លេខ២២) ក៏បានទាត់បាល់ដ៏អស្ចារ្យ ដែលជាគ្រាប់ជ័យជម្នះ របស់បឹងកេត ២-១។
ក្រោយចប់ការប្រកួតសប្តាហ៍ទី៧នេះ ពួកយើងនៅបន្តស្ថិតនៅចំណាត់ថ្នាក់លេខ ៣ដដែល ដោយមានពិន្ទុស្មើគ្នាជាមួយក្រុមលេខ ២ (យុវជនព្រះខ័នរាជស្វាយរៀង) និងលេខ ៤ (យុវជនភ្នំពេញក្រោន) ពោលគឺ ១៣ពិន្ទុ និងមានគម្លាត២ពិន្ទុប៉ុណ្ណោះពីក្រុមកំពូលតារាង យុវជនវិសាខា ( ១៥ពិន្ទុ) ។
*ពួកយើងឈរពីលើយុវជនភ្នំពេញក្រោន ដោយសាររូបមន្តគណនាក្នុងពានរង្វាន់នេះ គឺកំណត់លើប្រវត្តិជួបគ្នារវាងក្រុមទាំងពីរ ដោយពួកយើងបានឈ្នះយុវជនភ្នំពេញក្រោន ១-០ កាលពីជើងទី១
សម្រាប់កាលវិភាគប្រកួតក្នុងសប្តាហ៍ទី៨ ជាបន្តទៀតនៅក្នុងពានរង្វាន់ KMH CUP 2019 ពួកយើងនឹងត្រូវប្រឈមមុខជាមួយ យុវជនអគ្គិសនីកម្ពុជា ក្នុងថ្ងៃទី៩ ខែមីនា វេលាម៉ោង ៧យប់ ៕