ក្រោយការចាប់ឆ្នោតវគ្គជម្រុះ១៦ក្រុមចងក្រោយ(ថ្នាក់ជាតិ) នៃពានរង្វាន់សម្តេចអគ្គមហាសេនាបតី តេជោ ហ៊ុនសែន លើកទី១៣ ប្រចាំឆ្នាំ២០១៩ បានបង្ហាញថា ក្រុមបាល់ទាត់បឹងកេត នឹងត្រូវជួបប្រកួតជាមួយក្រុមបាល់ទាត់ខេត្តសៀមរាប ដោយនឹងត្រូវតទល់គ្នាចំនួន ២ជើង។

គ្រូបង្វឹករបស់បឹងកេត ហៅ សុជាតិ បានថ្លែងប្រាប់ក្រុមការងារ Boeungketfc.com អំពីលទ្ធផលនៃការចាប់ឆ្នោតនេះថា៖ « យើងដឹងហើយថាសៀមរាប គឺជាក្រុមរងជើងឯកថ្នាក់ខេត្ត ហើយទោះបីកម្រិតនៃក្រុមទាំងពីរ មានការខុសគ្នាក៏ដោយ ក៏យើងមិនអាចមើលងាយគូប្រកួតបានដែរ »។

« ម្យ៉ាងវិញទៀត គឺយើងត្រូវទៅលេងនៅទឹកដីរបស់ពួកគេ ដែលដឹងហើយថានៅទីនោះគឺមិនងាយស្រួលសម្រាប់យើងទេ ហើយមុនប្រកួតជាមួយពួកគេ យើងត្រូវជួបសូលទីឡូអង្គរ ក្នុងការប្រកួតលីគផងដែរ » ។

ដោយសារលក្ខន្តិកៈក្នុងការប្រកួតពានរង្វាន់សម្តេចតេជោ ហ៊ុន សែន តម្រូវឱ្យប្រើប្រាស់តែកីឡាករខ្មែរ លោកគ្រូ ហៅ សុជាតិ បញ្ជាក់ថា នឹងព្យាយាមផ្តល់ឱកាសដល់យុវជនក្មេងៗដើម្បីទទួលបានឱកាសសមត្ថភាព ។

សូមជម្រាបថា វគ្គ១៦ក្រុមចុងក្រោយ នឹងចាប់ផ្តើមជើងទី១ ពីថ្ងៃទី ១៩,២០,២៦ និង ២៧ ខែមិថុនា ខណៈជើងទី២ នឹងចាប់ផ្តើមពីថ្ងៃទី ៣ ខែកក្កដា តទៅ ៕

ចុចចែករំលែក