ការប្រកួតសប្តាហ៍ទី ៧ ដែលជាប្រកួតចុងក្រោយក្នុងជើងទីមួយ នៃក្របខ័ណ្ឌលីគកំពូលកម្ពុជា ( Cambodian Premier League ) បានបញ្ចប់ដោយ បឹងកេត ប្រកួតស្មើជាមួយនឹងភ្នំពេញក្រោន លទ្ធផល ២ទល់នឹង ២ នៅកីឡដ្ឋានស្មាត អ.អេស.អ៊ិន ក្រោមក្រសែភ្នែកនៃអ្នកទស្សនា ២,២៣៧នាក់ ។

ក្រុមទាំងពីរបានបើកការសំរុកគ្នាទៅវិញទៅមក ដែលឃើញថានៅត្រឹម ៨នាទីប៉ុណ្ណោះ កីឡាករ Neito របស់ភ្នំពេញក្រោន បានទាត់បញ្ចូលទីនាំមុខ ១គ្រាប់មុន និងត្រូវបានបឹងកេត វាយបកតាមស្មើវិញដោយការព្យាយាមទាត់ពីកីឡាករ សៀង ចន្ធា និងប៉ះជាមួយកីឡាករ Takaki Ose របស់ភ្នំពេញក្រោន ធ្វើឱ្យបាល់ចូលទី នៅនាទី ៣៨ ដែលលទ្ធផល ១-១។ លុះឈានដល់នាទី ៣៨ បឹងកេត ដែលជាក្រុមភ្ញៀវ បានបន្តរកគ្រាប់បាល់ ១គ្រាប់ថែមទៀត ដោយកីឡាករ សៀង ចន្ធា ធ្វើឱ្យលទ្ធផលបញ្ចប់វគ្គទី១ គឺ ១-២ ។

នៅក្នុងវគ្គទីពីរ ក្រុមម្ចាស់ផ្ទះបានបន្តការដាក់សម្ពាធដល់បឹងកេត និងគ្រាប់បាល់ទីបួន បានកើតឡើងនៅនាទី ៧០ ដោយកីឡាករ លឹម ពិសុទ្ធ របស់ភ្នំពេញក្រោន ទាត់បញ្ចូលទី ១គ្រាប់ ធ្វើឱ្យលទ្ធផលបញ្ចប់នៃការប្រកួតនេះ គឺស្មើគ្នា ២-២។

គួរបញ្ជាក់ថា ឆ្លងកាត់ការប្រកួតចំនួន ៨លើក នៃជុំទី១នេះ បឹងកេត ឈ្នះ ៤ ស្មើ ១ និងចាញ់ ២ មាន ១៣ពិន្ទុ ឈរលេខរៀងទី២ នៃតារាងពិន្ទុ ។ ការប្រកួត នឹងបន្តទៀតនៅខែមិថុនា ខាងមុខ ដោយបច្ចុប្បន្នសម្រាកអំឡុងព្រឹត្តិការណ៍ SEA GAMES នៅប្រទេសវៀតណាម។

ក្រោយការត្រលប់មកវិញនៃលីគកំពូលកម្ពុជា ជុំទី២ បឹងកេត នឹងត្រូវធ្វើដំណើរទៅប្រកួតនៅខេត្តកំពង់ស្ពឺ ទល់នឹងក្រុមបាល់ទាត់ណាហ្គាវើលដ៍ ៕

ចុចចែករំលែក