កាលពីរសៀលថ្ងៃអង្គារ៍ ទី៣០ ខែមេសា ឆ្នាំ២០១៩នេះ ក្លិបបាល់ទាត់បឹងកេត និងសាលារៀនអន្តរជាតិវេសឡាញបានចុះអនុស្សរណៈយោគយល់គ្នា ដែលរៀបចំធ្វើឡើងនៅសាលាវេសឡាញសាខាសន្ធរម៉ុក ។
ក្នុងកម្មវិធីនេះ មានការចូលរួមពីអ្នកស្រីប្រធានក្លិប ពុធ ធីតា លោកជំទាវ ឌិត នីតា តួនាទីជាសមាជិកក្រុមប្រឹក្សាភិបាលក្លិប លោក បែ មករា អគ្គលេខាធិការក្លិប រួមជាមួយនឹងកីឡាករក្រុមធំ និងក្រុមយុវជនផងដែរ។
រីឯភាគីសាលារៀនវេសឡាញវិញ លោក ប៉ិច បូឡែន ជាប្រធាននាយកប្រតិបត្តិ នៃក្រុមហ៊ុនវេសឡាញ អេឌ្យូខេសិន គ្រុប និងថ្នាកដឹកនាំសាលាប្រចាំសាខាដទៃក្នុងរាជធានីភ្នំពេញព្រមទាំងប្អូនៗសិស្សានុស្សិស្ស របស់សាលារៀនវេសឡាញជាច្រើនរូប។
ខ្លឹមសារសំខាន់ៗដែលបានធ្វើឡើងនៅក្នុងកម្មវិធីនេះ គឺការចុះហត្ថលេខាលើកិច្ចព្រមព្រៀងនៃអនុស្សរណៈយោគយល់គ្នា ដែលនឹងផ្តល់ឱ្យភាគីទាំងសងខាងនូវកិច្ចសហប្រតិបត្តិការដ៏រឹងមុំា រវាងវិស័យបាល់ទាត់ និងវិស័យអប់រំ ក៏ដូចជាការសម្រាំងយកនូវកីឡាករដ៏ល្អឥតខ្ចោះជាច្រើនទៅថ្ងៃអនាគត។
ជាមួយគ្នានោះផងដែរ ក៏មានសកម្មភាពនៃការទាត់បាល់ ( Freestyle ) របស់កីឡាករបឹងកេត ព្រមទាំងមានការផ្តល់ជូននូវកាដូរ (ឯកសណ្ឋានក្លិបបឹងកេត) ពីអ្នកស្រីប្រធានក្លិប ទៅកាន់តំណាងសាលារៀនវេសឡាញទៀតផង៕
ប្រធានក្រុម បឹងកេត កីឡាករ ហុង ផេង បានអះអាងក្រោយដឹកនាំក្រុមយកឈ្នះលើក្រុមបាល់ទាត់ខេត្តកំពង់ចាម ដោយលទ្ធផល ៧-០ នាល្ងាចថ្ងៃអាទិត្យកន្លងទៅនេះថា ស្ថានភាពរបស់ក្រុមនឹងត្រឡប់ទៅរកភាពល្អឡើងវិញ ។
ហុង ផេង ៖ «ការត្រៀមខ្លួនរបស់ពួកយើងក្នុងប៉ុន្មានប្រកួតដំបូងនេះ គឺបានល្អហើយ ប៉ុន្តែក្នុងបាល់ទាត់ ពេលខ្លះយើងត្រូវការសំណាងឱ្យនៅខាងយើងថែមទៀត »។
«ចំពោះយុវជន និងកីឡាករថ្មីៗដែលមកចូលរួមជាមួយពួកយើងក្នុងរដូវកាលថ្មីនេះ ភាគច្រើនគឺពួកគាត់អាចយល់និងចាប់បាននូវអ្វីដែលដែលជាការចង់បានរបស់គ្រូបង្វឹក និងក្រុម » ។
« លទ្ធផលនេះ ថ្វីត្បិតតែពួកយើងឈ្នះលើក្រុមដែលទើបបង្កើតថ្មី ប៉ុន្តែវាគឺជាលទ្ធផលដ៏ល្អ ដែលកីឡាកររបស់យើង ពុំមើលងាយលើគូប្រកួត ហើយតែងតែព្យាយាមពេញ ៩០នាទី »។
គួរបញ្ជាក់ថា ក្រោយប្រកួតសប្តាហ៍ទី៤នេះ បឹងកេត មាន ៧ពិន្ទុ ពីការប្រកួតឈ្នះភ្នំពេញក្រោន ៣-២ ចាញ់ អគ្គិសនីកម្ពុជា ១-០ ស្មើអង្គរថាយហ្គឺរ ១-១ និងឈ្នះកំពង់ចាម ៧-០ ៕
ក្រោយពីបានយកឈ្នះលើក្រុមយុវជន KMH អាយុក្រោម ១៨ឆ្នាំ ដោយលទ្ធផល ៦-០ កាលពីថ្ងៃសៅរ៍សប្តាហ៍មុននេះ ក្រុមយុវជនបឹងកេត អាយុក្រោម ១៨ឆ្នាំ បានក្លាយជាបេក្ខភាពចំណាត់ថ្នាក់លេខ ១ ឡើងទៅកាន់វគ្គផ្តាច់ព្រ័ត្រ KMH CUP 2019 ។
សរុបនៃការប្រកួតចំនួន ១២សប្តាហ៍ក្នុងវគ្គសន្សំពិន្ទុ គឺពួកយើង ឈ្នះ ៨លើក ស្មើ ១លើក និងចាញ់ ៣លើក ។
កំណត់ត្រាផ្សេងៗរបស់យុវជនបឹងកេត គិតត្រឹមវគ្គសន្សំពិន្ទុ៖
– កីឡាករ ហ៊ត ឈិនជិន គឺជាកីឡាករដែលមានស្ថិតិក្នុងការបញ្ជូនបាល់ឱ្យមិត្តរួមក្រុម ទាត់បញ្ចូលទី ( Assist ) ចំនួន ៨គ្រាប់ ។
– កីឡាករ នី បញ្ញា គឺជាកីឡាករដែលទាត់ចូលទីច្រើនជាងគេ ( Goal Scorers ) ប្រចាំក្រុម ពោលគឺ ៨គ្រាប់ ។
– ឆ្នាំដំបូងដែលក្រុមយុវជនបឹងកេត ឡើងដល់វគ្គផ្តាច់ព្រ័ត្រប្រជែងពានរង្វាន់ ក្រោយពីបង្កើតឡើង និងប្រមូលផ្តុំរយៈពេលខ្លីប៉ុណ្ណោះ។
– លើកដំបូងក្នុងអាជីពជាគ្រូបង្វឹក លោកគ្រូ ឈុន សុធារ័ត្ន បានដឹកនាំក្រុមឡើងទៅវគ្គផ្តាច់ព្រ័ត្រ
តទៅនេះ យុវជនបឹងកេត នឹងត្រូវរង់ចាំក្នុងវគ្គផ្តាច់ព្រ័ត្រ ដែលនឹងត្រូវជួបក្រុមឈ្នះ នៃការប្រកួតជម្រុះ របស់ ព្រះខ័នរាជស្វាយរៀង ភ្នំពេញក្រោន ឬ វិសាខា នៅថ្ងៃទី១ ខែមិថុនា ឆ្នាំ ២០១៩ ៕
ក្រោយដឹកនាំក្រុមយកឈ្នះលើកំពង់ចាម ដោយលទ្ធផល ៧-០ កាលពីថ្ងៃអាទិត្យ ម្សិលមិញនេះ គ្រូបង្វឹកបឹងកេត ហៅ សុជាតិ បានសម្តែងការរីករាយចំពោះជ័យជម្នះក្នុងសប្តាហ៍ទី៤ នៅលីគកំពូលកម្ពុជា រដូវកាល ២០១៩។
មានប្រសាសន៍ក្រោយចប់ការប្រកួត លោកបានអះអាងថា៖ « មុនពេលមកទីនេះ គឺយើងបានដាក់គោលដៅរួចហើយ ថាដើម្បីយក ៣ពិន្ទុ ហើយចំពោះគ្រាប់បាល់ច្រើនប៉ុណ្ណានោះយើងមិនអាចប៉ាន់ស្មានបានទេ តែខ្ញុំគិតថា គ្រាប់បាល់ប៉ុននេះ គឺគ្រប់គ្រាន់ហើយ » ។
ហៅ សុជាតិ៖ « យើងព្យាយាមដាក់បញ្ចូលកីឡាករថ្មីៗ និងយុវជនឱ្យបានចូលលេង ក្នុងការប្រកួតនេះ ដើម្បីទទួលបានឱកាសត្រៀមសម្រាប់ការប្រកួតក្រោយៗទៀត » ។
ចំពោះរបាយការណ៍នៃការប្រកួត បឹងកេត រកគ្រាប់បាល់បានដោយ ម៉ាត់ យ៉ាម៉ីន (នាទី ៥) ឃួន ឡាបូរ៉ាវី (នាទី៥៤) DUDU (នាទី ៣២, ៤៩) និង Julius (នាទី១០, ២៤, ៨៧) ។
ការប្រកួតក្នុងសប្តាហ៍បន្ទាប់ទៀតរបស់ពួកយើង គឺនឹងត្រូវប្រឈមមុខនឹងក្រសួងការពារជាតិ នៅថ្ងៃទី២៧ ខែមេសា នៅស្តាតចាស់ ៕
ក្រុមយុវជនបឹងកេតអាយុក្រោម ១៨ឆ្នាំ នឹងបញ្ចប់ការប្រកួតជុំទីពីរក្នុងពានរង្វាន់ KMH CUP 2019 សប្តាហ៍ទី១២ នៅថ្ងៃស្អែក ទី២០ ខែមេសា ឆ្នាំ២០១៩ ទល់នឹងក្រុមយុវជន KMH អាយុក្រោម ១៨ឆ្នាំ។
ប្រកួតនេះ គឺជាប្រកួតចុងក្រោយក្នុងវគ្គសន្សំពិន្ទុ នៃដំណើរទៅកាន់វគ្គជម្រុះដណ្តើមពានរង្វាន់ ដែលក្រោយចប់សប្តាហ៍ទី ១២ ក្រុមកំពូលតារាងទាំង ៤ នឹងត្រូវប្រកួតតាមរូបមន្តខ្វែង។
គិតត្រឹមសប្តាហ៍ទី១១ យុវជនរបស់យើង ឈរកំពូលតារាង មាន ២២ពិន្ទុ ហើយប្រសិនបើយើងឈ្នះការប្រកួតចុងក្រោយនេះ យើងនឹងក្លាយជាក្រុមចំណាត់ថ្នាក់លេខ ១ ផ្លូវការ រង់ចាំការប្រកួតដណ្តើមពានរង្វាន់។
ឆ្លងកាត់ការប្រកួតកន្លងមក របស់ក្រុមទាំងពីរ ក្នុងជំនួបកាលពីជើងទី១ គឺស្មើគ្នា ១ ទល់នឹង ១ ដែលកាលនោះ កីឡាករ ជឿន ពិសាខបរមី ជាអ្នករកគ្រាប់តាមស្មើនៅចុងម៉ោងប្រកួត។
សរុបការប្រកួត ៣លើកកន្លងមក របស់ក្រុមទាំងពីរ គឺ យុវជនបឹងកេត ឈ្នះ យុវជនកាហ្វេ ៦-០ ចាញ់យុវជនវិសាខា ១-២ និង ឈ្នះយុវជនភ្នំពេញក្រោន ១-០ ។ ចំណែកឯ យុវជន KMH វិញ ឈ្នះយុវជនអគ្គិសនី ៣-២ ឈ្នះយុវជនកាហ្វេ ៣-០ និងឈ្នះយុវជនវិសាខា ៣-២ ៕
កីឡាករយុវជន និងថ្នាក់ដឹកនាំរបស់ក្លិបបឹងកេត បានចូលរួមជាមួយតារាសម្តែង តារាចម្រៀងតំណាងឱ្យកម្ពុជា ជាច្រើនរូប បានប្រកួតឈ្នះក្រុមតារាចំរុះថៃ ដោយលទ្ធផល ២-១ក្នុងប្រកួតមិត្តភាពដើម្បីសប្បុរសធម៌ នៅកីឡដ្ឋាន Pathum Thani ក្នុងប្រទេសថៃ ។
ក្រុមតារាចំរុះកម្ពុជា រកគ្រាប់បាល់បានដោយកីឡាករ ចេន ដែលជាការទាត់បាល់ពិន័យ ១១ម៉ែត្រ ក្នុងវគ្គទី១ និង ១គ្រាប់ទៀតនៅចុងវគ្គទីពីរ ដោយកីឡាករ លឹម យូ ដែលជាគ្រាប់បាល់ជ័យជម្នះ ។
តាមគម្រោងនៃកម្មវិធីសប្បុរសធម៌នេះ ក្លិបបឹងកេត និងភាគីថៃ មានគម្រោងមកធ្វើការប្រកួតមិត្តភាពសប្បុរសធម៌លើកទីពីរ នៅរាជធានីភ្នំពេញនាថ្ងៃអនាគត ដើម្បីចូលរួមជួយដល់មន្ទីពេទ្យ និងកុមារកំព្រារបស់កម្ពុជា ៕
ក្រោយការប្រកួតសប្តាហ៍ទី១១ កន្លងទៅនៅក្នុងពានរង្វាន់ KMH CUP 2019 ក្រុមយុវជនបឹងកេតអាយុក្រោម១៨ឆ្នាំ បានយកឈ្នះលើយុវជនភ្នំពេញក្រោនអាយុក្រោម ១៧ឆ្នាំ ដោយលទ្ធផល ១-០ ។
គ្រាប់បាល់តែ ១គ្រាប់នោះគឺកើតឡើងនៅនាទី ៥០ ដោយកីឡាករ លី ម៉ាឯល ដែលអាចចាត់ទុកថាជាគ្រាប់បាល់ដ៏ល្អ។
ជ័យជម្នះនេះបាននាំឱ្យយុវជនរបស់យើង ឡើងទៅឈរកំពូលតារាងពិន្ទុ ក្រោយពីយុវជនវិសាខា បានបរាជ័យទល់នឹងយុវជន KMH ដោយលទ្ធផល ៣-២ ។
ដូចនេះប្រសិនពួកយើងអាចយកជ័យជម្នះក្នុងសប្តាហ៍ចុងក្រោយ នៃវគ្គសន្សំពិន្ទុ នោះយើងនឹងក្លាយជាក្រុមចំណាត់ថ្នាក់លេខ១ ផ្លូវការ ដោយមានសិទ្ធិរង់ចាំនៅវគ្គផ្តាច់ព្រ័ត្រដណ្តើមពានរង្វាន់ ។
សប្តាហ៍ចុងក្រោយរបស់យើង នឹងធ្វើឡើងនៅថ្ងៃទី ២០ ខែមេសា ឆ្នាំ២០១៩ ទល់នឹងក្រុមយុវជន KMH វេលាម៉ោង ១៧ និង០០នាទី នៅទីលាន KMH Park ៕
ក្លិបបឹងកេត មានកិត្តិយសសូមជម្រាបជូនដំណឹងដល់អ្នកគាំទ្រនិងសាធារណជនឱ្យបានជ្រាបថា នៅថ្ងៃអង្គារ៍ ទី៩ ខែមេសា ឆ្នាំ ២០១៩ខាងមុខនេះ ក្រុមតារាចំរុះកម្ពុជា នឹងធ្វើការប្រកួតមិត្តភាពសប្បុរសធម៌ ជាមួយក្រុមតារាចំរុះថៃ នៅកីឡដ្ឋាន Pathum Thani របស់ក្លិបកងទ័ពអាកាសថៃ Air Force United បន្ទាប់ពីពួកយើងប្រកួតចប់សប្តាហ៍ទី៣ ទល់នឹងអង្គរថាយហ្គឺរ នៅថ្ងៃអាទិត្យសប្តាហ៍នេះ។
កីឡាករ និងថ្នាក់ដឹកនាំរបស់ក្លិបបឹងកេត មួយចំនួន នឹងត្រូវចូលរួមជាមួយតារាសម្តែង តារាចម្រៀងរបស់កម្ពុជា ជាច្រើនរូបទៀត បង្ហាញវត្តមានក្នុងការប្រកួតនេះ ដែលកម្មវិធីនឹងចាប់ផ្តើមពីម៉ោង ៤រសៀល ដល់ម៉ោង ៩យប់ ដោយមានការសម្តែងជាច្រើនថែមទៀតផង។
តាមគម្រោងនៃកម្មវិធីសប្បុរសធម៌នេះ ក្លិបបឹងកេត និងភាគីខាងថៃ មានគម្រោងមកធ្វើការប្រកួតមិត្តភាពសប្បុរសធម៌លើកទីពីរ នៅរាជធានីភ្នំពេញនាថ្ងៃអនាគត ដើម្បីចូលរួមជួយដល់មន្ទីពេទ្យ និងកុមារកំព្រារបស់កម្ពុជា ៕
នៅក្នុងរដូវកាលថ្មី ឆ្នាំ ២០១៩នេះ កីឡាកររបស់ក្លិបបឹងកេត ចំនួន០៥រូប កំពុងជួបនឹងបញ្ហារបួស រួមមាន គឹម មករា (អ្នកចាំទី) លី វ៉ាហេទ (ខ្សែការពារ) ពុំ បារាំង (ខ្សែការពារ) ម៉ែន មុន្នីរ៉ា(ខ្សែការពារ) ម៉ាត់ នូរុណ (ខ្សែប្រយុទ្ធ) ដែលបច្ចុប្នន្នកំពុងសម្រាកព្យាបាលយ៉ាងយកចិត្តទុកដាក់ពីសំណាក់ក្រុមគ្រូពេទ្យរបស់ក្លិប។
តាមការបញ្ជាក់ពីគ្រូពេទ្យប្រចាំក្លិប បានឱ្យដឹងពីស្ថានភាពរបួសរបស់កីឡាករទាំង ០៥រូបក្រោយពីត្រឡប់មកពីធ្វើការព្យាបាល និងតាមដានរបួសនៅប្រទេសវៀតណាមកន្លងមក៖
១. គឹម មករា៖ បានឆ្លងកាត់ការវះជង្គង់ ២ខែហើយ មានសភាពល្អអាចធ្វើលំហាត់ប្រាណ សំរាប់បង្កើនសាច់ដុំភ្លៅមុខក្រោយបានធម្មតាវិញ និងត្រូវពិនិត្យម្តងទៀត នៅខែមិថុនាខាងមុខ។
២. ពុំ បារាំង៖ បានបញ្ចប់ការព្យាបាល(ចាក់ថ្នាំ) លើកទី៣ ត្រូវការសម្រាក៣ ទៅ ៥ថ្ងៃ អាចចូលហ្វឹកហាត់វិញបាន ។
៣. ម៉ែន មុន្នីរ៉ា៖ អាចធ្វើចលនាតិចៗ ដើរបានក្រោយការវះកាត់ ដោយមិនប្រើឈើច្រត់ ហើយត្រូវពិនិត្យអាការៈឡើងវិញ នៅខែមិថុនា ។
៤. ម៉ាត់ នូរុណ៖ ជង្គង់មានអាការៈប្រសើរឡើងក្រោយការវះកាត់ និងអាចដើរបានដោយមិនប្រើឈើច្រត់ ប៉ុន្តែត្រូវការពេលសម្រាកច្រើន ព្រោះទើបវះកាត់បាន ១ខែ ខណៈនឹងត្រូវពិនិត្យអាការៈឡើងវិញ នៅខែមិថុនា ខាងមុខដូចគ្នា។
៥. លី វ៉ាហេទ៖ រលាកសរសៃប្រសាទគូទី៧ ( Facial nerve ) នៃផ្ទៃមុខ ត្រូវការសំរាក ១ខែ ដើម្បីព្យាបាលសរសៃមុខឱ្យត្រឡប់មកធម្មតាវិញ ខណៈនៅសល់ ៣០%ទៀតជាសះស្បើយ ។
ក្លិបសូមជូនពរដល់កីឡាករទាំង៥រូប ដែលកំពុងសំរាកព្យាបាលរបួស ឆាប់ជាសះស្បើយដើម្បីត្រឡប់មកចូលរួមជួយក្លិបវិញក្នុងរដូវកាលនេះ ៕
ការប្រកួតសប្តាហ៍ទី ១១ ក្នុងពានរង្វាន់ KMH CUP 2019 នាថ្ងៃសៅរ៍ខាងមុខនេះ គឺក្រុមយុវជនបឹងកេតអាយុក្រោម ១៨ឆ្នាំ នឹងត្រូវជួបប្រកួតជាមួយក្រុមយុវជនភ្នំពេញក្រោន អាយុក្រោម ១៧ឆ្នាំ នៅទីលាន KMH Park វេលាម៉ោង ៣រសៀល ។
គិតមកត្រឹមពេលនេះ ក្រុមទាំងពីរកំពុងមានលេខរៀងប្រកៀកគ្នា ដោយយុវជនបឹងកេត ឈរលេខរៀងទី ៣ មាន ១៩ពិន្ទុ និងយុវជនភ្នំពេញក្រោនឈរលេខរៀងទី ២ មាន២០ពិន្ទុ។
ប្រកួតក្នុងចុងសប្តាហ៍នេះ គឺជាប្រកួតចុងក្រោយនៃវគ្គសន្សំពិន្ទុរបស់យុវជនភ្នំពេញក្រោន ខណៈដែលបឹងកេត គឺនៅសល់ ១ប្រកួតទៀត។
សរុបលទ្ធផលរបស់ក្រុមទាំងពីរ នៃការប្រកួតចំនួន ៣លើកចុងក្រោយ បានបង្ហាញឱ្យឃើញថា៖
យុវជនបឹងកេត ឈ្នះ យុវជនអគ្គិសនីកម្ពុជា ២-០ ឈ្នះយុវជនកាហ្វេ ៦-០ និងបរាជ័យទល់នឹងយុវជនវិសាខា ១-២ ។ គ្រាដែលយុវជនភ្នំពេញក្រោន បានប្រកួតស្មើជាមួយយុវជនអគ្គិសនីកម្ពុជា ១-១ ឈ្នះយុវជនកាហ្វេ ៥-០ និងឈ្នះយុវជនវិសាខា ៣-១ ។
កីឡាករដែលកំពុងលេចធ្លោក្នុងក្រុមទាំងពីរគឺ លី ម៉ាឯល របស់បឹងកេត ពោលគឺរូបគេរកបាន ៣គ្រាប់ក្នុងការប្រកួត ៤ដងនៃជុំទីពីរនេះ ស្របពេលដែលយុវជនរបស់ភ្នំពេញក្រោន លឹម ពិសិដ្ឋ កំពុងឡើងជើងល្អ ក្នុងនោះគឺរូបគេស៊ុតចូលទី ៥គ្រាប់ ក្នុង២ប្រកួតចុងក្រោយនេះ និងកំពុងឈរកំពូលតារាងកីឡាករទាត់ចូលទីច្រើនជាងគេផងដែរ ។
ជឿជាក់ថាការប្រកួតនាថ្ងៃសៅរ៍ សប្តាហ៍នេះ គឺចំាបាច់បំផុតសម្រាប់ក្រុមទាំងពីរក្នុងការធានាកៅអីទៅកាន់វគ្គជម្រុះ ក្នុងនាមជាក្រុមកំពូលទាំង ៤ ។
លទ្ធផលជួបគ្នាកាលពីជើងទី១៖
យុវជនភ្នំពេញក្រោន អាយុក្រោម ១៧ឆ្នាំ ១-២ យុវជនបឹងកេតអាយុក្រោម ១៨ឆ្នាំ