នៅថ្ងៃនេះកីឡាករខ្សែការពារកណ្ដាលរបស់យើងបានឯកភាពលើកិច្ចព្រមព្រៀងជាមួយក្លិបក្នុងការបន្ថែមសុពលភាពនៃកិច្ចសន្យារបស់ខ្លួនរហូតដល់ បំណាច់ឆ្នាំ២០២០។

ក្រោយជជែកពិភាក្សាជាមួយថ្នាក់ដឹកនាំរួច ផេង ហាក់ពុំមានភាពស្ទាក់ស្ទើរឡើយក្នុងការចាប់កាន់ប៊ិចស៊ីញ៉េលើក្រដាសកិច្ចសន្យាដែលភាគីទាំងសងខាងបានឯកភាពគ្នានេះ។ ផេង បង្ហាញអារម្មណ៍សប្បាយរីករាយនិងពេញចិត្តជាទីបំផុតដែលថ្នាក់ដឹកនាំផ្ដល់ទំនុកចិត្តដល់រូបគេ។ កីឡាករដែលមានដើមកំណើតមកពីខេត្ត បាត់ដំបងរូបនេះរំពឹងថាខ្លួននឹងខិតខំ ធ្វើយ៉ាងណាពង្រឹងសម្ថភាពបន្ថែមទៀតជាពិសេសការជួយជ្រោមជ្រែងក្លិបឲ្យទទួលបានជោគជ័យនឹងដណ្ដើមពានរង្វាន់នានាឲ្យបាន។

ការចុះហត្ថលេខានេះបានធ្វើឡើង១ថ្ងៃក្រោយ ហុង ផេង បានក្លាយជាវិរៈបុរសក្នុងការប្រកួតដ៏តានតឹងកាលពីម្សិលមិញដោយស៊ុតគ្រាប់ជ័យជំនះឲ្យ បឹងកេតយកឈ្នះភ្នំពេញក្រោនដោយលទ្ធផល ៣-២ នៅនាទី ៦៦ តែមិនមែនដោយសារមូលហេតុនេះទើប ក្លិបសម្រេចចិត្តបន្ថែមកិច្ចសន្យាឡើយពោលគឺក្លិបមានគម្រោងបន្ថែមកិច្ចសន្យាដល់កីឡាកររូបនេះយូរមកហើយ ចំណែកកីឡាករផ្សេងៗទៀតនឹងត្រូវបានជជែកលើរឿងនេះជាបន្ដបន្ទាប់។