កីឡាករដែលរួមរស់ជាមួយក្លិបបាល់ទាត់បឹងកេតយូរជាងគេ លី មីហ្សាន បានបង្ហាញអំពីចំណាប់អារម្មណ៍របស់ខ្លួន ជុំវិញការប្រកួតដ៏សំខាន់បំផុតនាដំណាច់រដូវកាល ២០២០នេះ ដោយអះអាងថា ខ្លួន និងក្រុម នឹងប្រឹងប្រែងឱ្យអស់ពីសមត្ថភាព ដើម្បីគោលដៅរួមគ្នា ទាំងក្លិប និងអ្នកគាំទ្រ ។
លី មីហ្សាន៖ “ ការប្រកួតថ្ងៃអាទិត្យនេះ នឹងជាការប្រកួតដ៏តានតឹងបំផុត ហើយចំពោះក្លិបយើង វាដូចជាការប្រកួតផ្តាច់ព្រ័ត្រមួយ ព្រោះយើងត្រូវតែឈ្នះដើម្បីលើកពាន និងពួកគេក៏ត្រូវការឈ្នះដើម្បីអ្នកគាំទ្ររបស់គេ។ ”
“ សម្រាប់ខ្ញុំបានរស់នៅបឹងកេត ៨ឆ្នាំមកហើយ ខ្ញុំគិតថាក្លិបមានការរៀបចំល្អ ពិសេសកីឡាករល្អ តាំងពីជំនាន់មុនមក ចេះសាមគ្គីគ្នា ចេះស្រលាញ់គ្នា និងពិសេសជាងនេះទៀត គឺថ្នាក់ដឹកនាំ ទាំងចាស់ ទាំងថ្មី គឺពួកគាត់ល្អសម្រាប់កីឡាករណាស់ គាត់តែងតែយកចិត្តទុកដាក់ចំពោះកីឡាករជានិច្ច។ ” ខ្សែបំរើកណ្តាលរូបនេះបន្ត។
“ ខ្ញុំ និងក្រុមបានត្រៀមខ្លួនរួចរាល់ហើយសម្រាប់ការប្រកួតដើម្បីឈ្នះពានលីគជាលើកទីបួនរបស់ក្លិប និងខ្លួនខ្ញុំផងដែរ។ ” នេះគឺជាការប្តេជ្ញាចិត្តរបស់ម្ចាស់ឯកសណ្ឋានលេខ ១៧ បានលើកឡើង ។
ចុងក្រោយ មីហ្សាន ក៏មានសារទៅកាន់អ្នកគាំទ្របឹងកេតទាំងអស់ថា៖ “ សូមអរគុណដល់អ្នកគាំទ្រ ទោះដល់ទីណាក៏ពួកគាត់ទៅគាំទ្រជានិច្ច សូម្បីពេលមិនអនុញ្ញាតឱ្យទស្សនា ក៏ពួកគាត់នៅឈរមើលតាមរបង អរគុណមែនទែនចំពោះទឹកចិត្តរបស់អ្នកទាំងអស់គ្នា ហើយពួកខ្ញុំប្តេជ្ញាថានឹងប្រឹងប្រែងអស់ពីសមត្ថភាពនៅថ្ងៃអាទិត្យនេះ ដើម្បីសំរេចបំណងរបស់ពួកយើង ដែលចង់បានពានដូចគ្នា។ ”
គួររំលឹកថា លី មីហ្សាន បានរួមរស់ជាមួយក្លិបបឹងកេត ចាប់តាំងពីក្លិបកកើតឡើងនៅ ឆ្នាំ ២០១២ ដោយក្នុងប្រវត្តិសាស្រ្តដែលក្លិបគ្រងជើងឯកលីគចំនួន ៣សម័យកាល ក៏មានវត្តមានរូបគេផងដែរ ដែលជាកីឡាកររួមរស់ជាមួយក្លិបយូរជាងគេបង្អស់។
បឹងកេត នឹងប្រកួតបញ្ចប់រដូវកាល ២០២០នេះ ដោយប្រកួតទល់នឹងក្លិបភ្នំពេញក្រោន នៅថ្ងៃទី ២៥ ខែ តុលា នៅកីឡដ្ឋាន អ.អេស.អ៊ិន វេលាម៉ោង ៦ល្ងាច ជាមួយនឹងការរំពឹងត្រឹមលទ្ធផល ស្មើប៉ុណ្ណោះ ដើម្បីគ្រងជើងឯកលីគកំពូលកម្ពុជា ៕
ខ្សែបម្រើវ័យក្មេង សៅ វ៉ៃហ្វ៊ី ដែលទើបផ្លាស់មកចូលរួមក្លិបបឹងកេត នារដូវកាល ២០២០នេះ ទទួលបានឱកាសបង្ហាញខ្លួន ២ប្រកួតជាប់គ្នា ក្នុងពានរង្វាន់សម្តេចហ៊ុន សែន និង លីគកំពូលកម្ពុជា ក្រោមការដឹកនាំរបស់លោក គឹម ភក្តី ជាគ្រូបង្គោលបណ្តោះអាសន្ន។
អតីតយុវជនសាលាបាល់ទាត់ជាតិបាទី រូបនេះ បានបង្ហាញអារម្មណ៍ថា៖ “ ខ្ញុំពិតជារំភេីប និងគោរពអរគុណដល់លោកគ្រូដែលផ្តល់ជំនឿជាក់ដល់ខ្លួនខ្ញុំបានផ្តល់ឱកាសបញ្ចេញសមត្ថភាព ខ្ញុំគិតថាបទពិសោធន៍នៅតិច តែលោកគ្រូផ្តល់ឱកាសហេីយ ខ្ញុំតាំងចិត្តព្យាយាមប្រឹងប្រែងអោយអស់ពីសមត្ថភាព ” ។
ជុំវិញស្ថានភាពនៃការប្រកួតក្នុងពានរង្វាន់សម្តេចហ៊ុន សែន និងលីគកំពូល យុវជន សៅ វ៉ៃហ្វ៊ី បានលើកឡើងថា៖ “ ក្នុងការលេងទាំងពីរប្រកួតនេះខ្ញុំគិតថាជាជំហានមួយថ្មីសម្រាប់ការអភិវឌ្ឍខ្លួន និងការដកបទបទពិសោធន៍មួយកម្រិតបន្ថែមទៀតពីបងៗជំនាន់មុន ជាពិសេសការប្រកួតលីគគឺជាការប្រកួតមួយដ៏ជក់ចិត្ត មេឃភ្លៀងផងបណ្តាលអោយលំបាកក្នុងការបញ្ជូនបាល់តែវាជាបទពិសោធន៍ល្អថាយេីងគួររកវិធីសាស្ត្រយ៉ាងណាដេីម្បីបញ្ជូនបាល់ទៅកាន់មិត្តក៏ដូចជាបងៗរួមក្រុមរបស់យេីង ពីរប្រកួតនេះខ្ញុំពេញចិត្ត ហេីយបានប្រឹងប្រែងយ៉ាងពេញទំហឹងដេីម្បីក្លិបទទួលបានជោគជ័យ ទោះប្រកួតទីមួយយេីងបានចាញ់តែខ្ញុំទទួលបានបទពិសោធន៍ល្អពីដៃគូ ” ។
យុវជនវ័យទើបតែ ១៩ឆ្នាំរូបនេះបន្តថា៖ “ ដំបូងខ្ញុំបាទ មិននឹកស្មានថាការបង្ហាញខ្លួនលេីកដំបូងរបស់ខ្ញុំអាចទាក់ទាញចំណាប់អារម្មណ៍អ្នកគាំទ្រទេ តែនេះជាកំលាំងចិត្តមួយដ៏ក្លាំងក្លាដែលនឹងអាចជួយជុំរុញទឹកចិត្តនិងបេះដូងរបស់ខ្ញុំអោយកាន់តែមានភាពក្លាហាននិងភាពជឿជាក់មកលេីខ្លួនឯងកាន់តែខ្ពស់ឈានទៅរកគោលដៅនៃក្តីស្រមៃរបស់ខ្ញុំ អារម្មណ៍ពិតរបស់ខ្ញុំផ្ទាល់សូមផ្ញេីសាដែលចេញអំពីបេះដូងទៅកាន់អ្នកគ្រប់គ្នាដែលបានគាំទ្រនិងផ្តល់កំលាំងចិត្តដល់ខ្ញុំបាទ ខ្ញុំពិតជារំភេីបនិងអរគុណយ៉ាងខ្លាំងដល់ពុកម៉ែបងប្អូនគ្រប់ទិសទី ហេីយនិងតាំងចិត្តតស៊ូបន្តការហ្វឹកហាត់ដេីម្បីធ្វេីការប្រយុទ្ធនៅលេីទីលានវាលស្មៅអោយកាន់តែល្អ ប្រកបដោភាពថ្លៃថ្នូរនិងទំនួលខុសត្រូវ គោរពជូនពរអ្នកគាំទ្រជួបតែសុខសំណាងល្អ ស្រឡាញ់អ្នកគ្រប់គ្នាជានិច្ចនិរន្តិ៍ ” ។
វ៉ៃហ្វ៊ី បានបន្ថែមថា៖ “ គោលដៅរបស់ខ្ញុំមកបឹងកេត គឺមកដេីម្បីជួយក្លិបដែលខ្ញុំស្រឡាញ់អោយកាន់តែខ្លាំងក្លាឡេីងមួយកម្រិតទៀត បឹងកេតជាក្លិបដំបូងរបស់ខ្ញុំតែវាជាផ្ទះដ៏កក់ក្តៅមួយសម្រាប់ខ្ញុំ ទាំងមិត្តភក្តិនិងបងៗ រួមទាំងលោកគ្រូព្រមទាំងម្ចាស់ក្លិប បេះដូងរបស់ពួកយេីងគឺមានគោលដៅតែមួយ ក្តីស្រមៃតែមួយ ខ្ញុំមកកាន់ទីនេះដេីម្បីអភិវឌ្ឍខ្លួននិងតាំងចិត្តថា ជួយក្លិបអោយរីកចំរេីនតាមដែលអាចធ្វេីទៅបាន ស្រឡាញ់គោរព ការសាមគ្គី ភក្តីភាព គុណធម៌ សីលធម៌មានគ្រប់យ៉ាងនៅក្នុងក្លិបមួយនេះ ” ។
គួររំលឹកថា សៅ វ៉ៃហ្វី ត្រូវបានលោក គឹម ភក្តីផ្តល់ឱកាសឱ្យលេងក្នុងជំនួបសប្តាហ៍ទី ១៧ ទល់នឹងកងយោធពលខេមរភូមិន្ទ ដែលទទួលបានជ័យជម្នះ ២-០ ក្រោមមេឃភ្លៀងធ្លាក់ពេញ ៩០នាទីនៃការប្រកួត ។ គិតត្រឹមបច្ចុប្បន្ន រូបគេ ទទួលបានឱកាសបង្ហាញខ្លួន ៣ប្រកួតក្នុងពានរង្វាន់សម្តេចហ៊ុន សែន និង ១ប្រកួត ក្នុងពានរង្វាន់លីគកំពូលកម្ពុជា ខណៈនៅសល់ ១ប្រកួតទៀតបញ្ចប់រដូវកាល ២០២០៕
ខ្សែការពារ ហុង ផេង របស់ក្លិបបឹងកេត បានទទួលជោគជ័យលើការវះកាត់ជង្គង់ឆ្វេងរបស់ខ្លួនកាលពីរសៀលថ្ងៃច័ន្ទ ទី៥ ខែតុលា ឆ្នាំ ២០២០ ។ នេះបើតាមការបញ្ជាក់ពីក្រុមការងារគ្រូពេទ្យប្រចាំក្លិបបានប្រាប់ឱ្យដឹង។
លោកគ្រូពេទ្យ ហ៊ុន ប៉េងឡុង បានបញ្ជាក់ថា៖ “ ផេង បានរងរបួសអំឡុងពេលហ្វឹកហាត់ជាមួយក្រុម ក្រោយសម្រាកពីភ្ជុំបិណ្ឌមកវិញ ដែលភ្លាត់សរសៃជង្គង់ឆ្វេង ហើយក្រោយពីទទួលបានជោគជ័យការវះកាត់នេះ រូបគេនឹងត្រូវចំណាយពេល ៨ខែ ទើបអាចចូលហ្វឹកហាត់ និងប្រកួតវិញបាន ” ។
ជុំវិញអវត្តមានដោយសារតែរបួសជាលើកទីពីរនេះ ខ្សែការពារដែលមានបទពិសោធន៍ច្រើននៅបឹងកេតរូបនេះ បានបង្ហាញអារម្មណ៍ថា៖ “ ខ្ញុំពិតជាសោកស្តាយមែនទែនចំពោះរឿងនេះ ព្រោះពេលនេះក្រុមកំពុងតែធ្វើការធ្ងន់ទាំងនៅលីគ និងពានរង្វាន់សម្តេច តែខ្ញុំសូមជូនពរឱ្យក្រុមរបស់យើង ទទួលបានជោគជ័យ ហើយអរគុណដល់អ្នករាល់គ្នាដែលបានជូនពរខ្ញុំ ពិសេសថ្នាក់ដឹកនាំក្លិបដែលយកចិត្តទុកដាក់មកលើខ្ញុំ ” ។
គ្រប់គ្នានៅក្លិបបឹងកេត សូមជូនពរដល់កីឡាករ ហុង ផេង ឱ្យឆាប់ជាសះស្បើយ និងត្រលប់មកចូលរួមជាមួយក្លិបវិញ ៕