ថ្ងៃនេះ ក្រុមការងារគេហទំព័រ boeungketfc.com បានធ្វើកិច្ចសម្ភាសន៍ជាមួយនឹងអ្នកចាំទីវ័យក្មេង ហ៊ុល គីមហ៊ុយ ជុំវិញការចាប់ផ្តើមយ៉ាងល្អជាមួយក្លិបបឹងកេត ចាប់តាំងពីមករួមរស់កាលពីរដូវកាល ២០១៩កន្លងទៅ និងបានក្រសោបយកពានរង្វាន់ធំៗទាំងពីរ គឺ ពានរង្វាន់សម្តេចហ៊ុន សែន ឆ្នាំ ២០១៩ និង ពានរង្វាន់លីគកំពូលកម្ពុជា រដូវកាល ២០២០ និងទទួលបានពានរង្វាន់អ្នកចាំទីល្អជាងគេប្រចាំឆ្នាំ ២០១៩ និង ២០២០ថែមទៀតផង ។
គីមហ៊ុយ, ចូរប្អូនប្រាប់ពីអារម្មណ៍របស់ប្អូន ចំពោះរដូវកាល ២០២០នេះ តើប្អូនទទួលបានអ្វីខ្លះ?
“ ខ្ញុំមានអារម្មណ៍រំភើបមែនទែន ដែលពួកយើងរួមរស់ជាមួយគ្នាពេញ១រដូវកាលនេះ ដោយឆ្លងកាត់នូវរឿងរ៉ាវលំបាកជាច្រើន ដូចជាការកាត់បន្ថយប្រាក់ខែអំឡុងជំងឺ COVID-19 តែពួកយើងនៅតែតស៊ូ ខំប្រឹងហ្វឹកហាត់រហូតបានឈ្នះពានលីគ ”
អ្វីដែលប្អូនទទួលបានក្នុងរយៈពេល ២រដូវកាលនៅបឹងកេត ?
“ សម្រាប់ ២រដូវកាលរបស់ខ្ញុំជាមួយបឹងកេត គឺទទួលបានបទពិសោធន៍ច្រើនមែនទែន តាំងពីការរស់នៅលក្ខណៈ Professional ទាំងការហ្វឹកហាត់ អារម្មណ៍ប្រកួត ” ។
តើវាជារឿងមិននឹកស្មានមែនទេ ចំពោះប្អូនដែលទទួលបានសមទ្ធិផលលឿនក្នុងការចូលរួមជាមួយក្លិប?
“ គោលដៅរបស់ខ្ញុំពេលចេញពីសាលាបាល់ទាត់ជាតិ គឺពិតជាច្រើនមែនទែនសម្រាប់ខ្ញុំ ព្រោះដំបូងខ្ញុំគិតថាធ្វើយ៉ាងណាដណ្តើមឱ្យបានជម្រើស ១១នាក់ដំបូងសិន តែអ្វីដែលមិននឹកស្មានគឺ ឈ្នះពានអ្នកចាំទីល្អ នៅលីគកំពូលកម្ពុជា ២ឆ្នាំជាប់គ្នា ” ។
ពួកយើងនឹងត្រូវចូលរួមក្នុងពានរង្វាន់អន្តរជាតិ គឺ AFC CUP 2021 តើប្អូនយល់យ៉ាងណាដែរ ?
“ ចំពោះពានរង្វាន់ AFC CUP ដែលយើងនឹងចូលរួមនៅឆ្នាំ ២០២១ ខ្ញុំគិតថាជាឱកាសល្អដើម្បីឱ្យយើងអាចបង្ហាញសមត្ថភាពតទល់ជាមួយនឹងក្រុមខ្លាំងៗក្នុងតំបន់ ហើយក៏ជាឱកាសមួយដែលអាចឱ្យមជ្ឍដ្ឋានខាងក្រៅមើលអំពីសមត្ថភាពរបស់ពួកយើង នោះយើងនឹងមានឱកាសបានទៅលេងក្រៅស្រុកថែមទៀតផង ” ។
តើកត្តាអ្វីខ្លះ ដែលនាំប្អូនឱ្យជោគជ័យដូចបច្ចុប្បន្ននេះ ?
គឹមហ៊ុយ៖ ១. គោលដៅ ២. ការខិតខំប្រឹងប្រែង ៣. មិនបោះបង់ ។
ខ្សែបម្រើសញ្ជាតិជប៉ុន Mizuno Hikaru បានពិពណ៌នាអំពីរដូវកាល ២០២០ ដែលខ្លួនជាចំណែកមួយជួយក្លិប បឹងកេត ឈ្នះពានលីគកំពូលកម្ពុជា ជាលើកទី ៤ ក្នុងប្រវត្តិសាស្រ្ត និងជាលើកទី ២ របស់គេផងដែរ។
“ ខ្ញុំពិតជារីករាយ ដែលពួកយើងបានក្លាយជាជើងឯកឆ្នាំ ២០២០នេះ ហើយពិសេសគឺ យើងមិនបរាជ័យ ខ្ញុំពិតជាមានមោទកភាពជាមួយលទ្ធផលនេះ ” ។ Mizuno ពន្យល់យ៉ាងដូច្នេះថា៖ “ ពួកយើងធ្វើការជាក្រុមបានល្អជាងឆ្នាំមុន ហើយទំនាក់ទំង គឺល្អចំពោះគ្រប់គ្នា មិនថានៅក្នុងទីលាន និងក្រៅទីលាន ” ។
“ នៅពេលដែលខ្ញុំឈ្នះពានកាលពីឆ្នាំ ២០១៧ ខ្ញុំមានអារម្មណ៍ថាពិតជាចង់ឈ្នះពាននេះម្តងទៀត ហើយទីបំផុតឆ្នាំនេះក៏កើតឡើង អញ្ចឹងខ្ញុំពិតជាសប្បាយចិត្ត
” ។
“ គោលដៅបន្តទៀតរបស់ខ្ញុំនៅឆ្នាំ ២០២១ គឺនៅតែជាជើងឯក តែងអ្វីដែលពិសេសនោះ គឺខ្ញុំនឹងព្យាយាមឈ្នះការប្រកួតក្នុងពានរង្វាន់ AFC CUP ព្រោះខ្ញុំបានលេង ២ដងហើយ (ឆ្នាំ ២០១៧ និង ២០១៨) ប៉ុន្តែមិនទទួលបានលទ្ធផលល្អសម្រាប់យើង អញ្ចឹងយើងនឹងព្យាយាមឱ្យបានលទ្ធផលល្អជាងនោះ ” ។
“ អ្នកគាំទ្រជាទីនឹករលឹក ខ្ញុំសូមសម្តែងការកោតសរសើរដល់អ្នកទាំងអស់គ្នា ព្រោះអ្នកទាំងអស់គ្នានេះហើយ ដែលបានធ្វើឱ្យពួកយើងរឹងមាំ ខ្លាំងក្លា ។ អរគុណដែលតែងតែផ្តល់ឱ្យពួកយើងនូវអារម្មណ៍ល្អៗក្នុងការប្រកួត ” ។
គួររំលឹកថា នៅក្នុងរដូវកាល ២០២០នេះ Mizuno Hikaru ទទួលបានឱកាសបង្ហាញខ្លួនក្នុងជម្រើស១១នាក់ដំបូង ចំនួន ១៤ប្រកួត ក្នុងចំណោម១៦ប្រកួត ឱ្យក្លិបបឹងកេត ខណៈរកគ្រាប់បាល់បាន ១គ្រាប់ និង Assist ១លើក ៕
លោក ហៅ សុជាតិ ដែលមានតួនាទីជានាយកអភិវឌ្ឍយុវជនបឹងកេត បានបង្ហាញអំពីទិសដៅ និងការរៀបចំក្រុមយុវជនពីរកម្រិត គឺអាយុក្រោម ១៥ឆ្នាំ និងក្រោម ១៨ឆ្នាំ ថាដែលត្រៀមចូលរួមប្រកួតពានរង្វាន់សហព័ន្ធកីឡាបាល់ទាត់កម្ពុជា ប្រចាំឆ្នាំ ២០២០នេះ។
“ ជាការពិតទៅការរៀបចំ និងត្រៀមខ្លួនក្រុមយុវជនចូលរួមប្រកួតក្នុងពានរង្វាន់របស់សហព័ន្ធ គឺពួកយើងត្រៀមខ្លួនបានល្អដោយក្រុម U15 យើងបានធ្វើតេស្ដជ្រើសរើសកីឡាករយុវជនល្អៗមួយចំនួនមកពីតាមខេត្ត និងមួយចំនួនទៀតសិ្ថតនៅទីក្រុងភ្នំពេញ។ ចំណែក U18 វិញដោយសារឆ្នាំមុន យើងធ្វើមិនបានល្អ ហេតុដូចនេះហើយឆ្នាំនេះយើងមានការជំរុះ និងបន្ថែមសមាសភាពកីឡាករថ្មីៗមួយចំនួនដើម្បីជួយក្រុម ” ។
ជុំវិញការផ្អាកការប្រកួតជាបណ្តោះអាសន្នអំឡុងជំងឺ COVID-19 កំពុងស្ថិតក្នុងការព្រួយបារម្ភ លោកបានលើកឡើងថា៖ “ វាអាចផ្ដល់ផលប៉ះពាល់ដល់ការហ្វឹកហាត់របស់កីឡាករយើងដែរ ពីព្រោះមុនពេលមិនទាន់មានការផ្អាកនេះ ពួកយើងមានការហ្វឹកហាត់ជុំគ្នា ហើយពេលនេះយើងត្រូវឱ្យកីឡាករសំរាក ហើយពេលដែលពួកគាត់ត្រឡប់មកវិញយើងត្រូវរៀបចំសារជាថ្មី ” ។
លោកបន្តថា៖ “ យើងស្ដាយនូវអ្វីដែរយើងបានរៀបចំពីមុនមកតែយើងក៏ត្រូវគិតពីសុខភាព និងសុវត្ថិភាពរបស់ពួកគាត់ដែរ ហេតុដូចនេះយើងត្រូវបង្វំចិត្តអោយពួកគាត់សំរាកតាមការប្រកាសរបស់រាជរដ្ឋាភិបាល តែក្រុមគ្រូៗ ក៏បានដាក់លំហាត់មួយចំនួនអោយពួកគាត់ហាត់នៅផ្ទះ ដើម្បីរក្សាកំលាំងត្រឡប់មកងាយស្រួលក្នុងការរៀបចំក្រុមជាថ្មី ” ។
សម្រាប់កាលវិភាគប្រកួតរបស់ក្រុមយុវជនអាយុក្រោម ១៥ឆ្នាំ និងក្រោម ១៨ឆ្នាំ៖
ខ្សែការពារវ័យក្មេង ដែលមានកាយសម្បទារ៉ឹងមាំ កីឡាករ ទេស សម្បត្តិ បានបង្ហាញចំណាប់អារម្មណ៍ថាខ្លួនពិតជាពេញចិត្ត និងរីករាយចំពោះអ្វីដែលខ្លួនបានធ្វើ ជាមួយក្លិប ពិសេសការឈ្នះជើងឯកលីគកំពូលកម្ពុជា រដូវកាល ២០២០នេះ ។
ថ្លែងប្រាប់ក្រុមការងារព័ត៌មានរបស់គេហទំព័រ boeungketfc.com ខ្សែការពាររូបនេះបានរៀបរាប់ថា៖ “ សម្រាប់ខ្ញុំ នៅរដូវកាលទី២នេះ ខ្ញុំគិតថា ខ្ញុំធ្វើបានល្អ ហើយខ្ញុំព្យាយាមវិវត្តន៍ខ្លួនឱ្យទៅជា Professional ជាងរដូវកាលទី១ ដែលនៅបឹងកេត ” ។
រូបគេបន្តថា៖ “ ខ្ញុំសប្បាយចិត្ត ដែលបានតបស្នងសងគុណទៅក្លិប ដែលក្លិបខំយកខ្ញុំមក ទាំងដែលក្លិបណាក៏អត់ទាក់ទងខ្ញុំ ។ មានអារម្មណ៍ថាអស្ចារ្យមែនទែន ដែលខ្ញុំបានធ្វើរឿងតបស្នងទៅក្លិបវិញ ក្នុងរយៈពេល ២ឆ្នាំនៅបឹងកេតនេះ ” ។
សូមបញ្ជាក់ថា ចាប់តាំងពីចូលរួមជាមួយក្លិបបឹងកេត ដែលជាការចាប់ផ្តើមបាល់ទាត់អាជីពលើកដំបូងរបស់ កីឡាករ ទេស សម្បត្តិ រូបគេបានជួយក្លិបឈ្នះពានរង្វាន់សម្តេចហ៊ុន សែន លើកទី១៣ កាលពីឆ្នាំ ២០១៩ និងឈ្នះពានរង្វាន់លីគកំពូលកម្ពុជា ក្នុងឆ្នាំ ២០២០នេះ ថែមទៀតផង។
មិនត្រឹមតែប៉ុណ្ណោះ សម្បត្តិ ត្រូវបានគ្រូបង្គោលផ្តល់សេចក្តីទុកចិត្ត ឱ្យក្លាយជាប្រធានក្រុម ដឹកនាំការប្រកួត នាពាក់កណ្តាលរដូវកាលទៀតផង ។
គោលដៅរបស់ ទេស សម្បត្តិ នៅឆ្នាំ ២០២១ ត្រូវបានរូបគេបកស្រាយថា៖ “ សម្រាប់ឆ្នាំក្រោយ គឺអត់ខុសប្លែកពីរាល់ដងទេ ខ្ញុំនឹងព្យាយាមជួយក្លិបឱ្យឈ្នះពានយ៉ាងហោចណាស់ ១ ឬបើអាចទាំងពីរតែម្តង ហើយខ្ញុំនឹងធ្វើឱ្យគេស្គាល់ពីក្រុមនៅស្រុកខ្មែរ ថាយើងរីកចំរើនខ្លាំងទៅៗ ពេលទៅលេងពាន AFC CUP ” ។
ជាចុងក្រោយ ទេស សម្បត្តិ បានផ្ញើសារថា៖ “ ខ្ញុំសូមថ្លែងអំណរគុណយ៉ាងជ្រាលជ្រៅដល់អ្នកគាំទ្រទាំងអស់ ដែលតែងតែគាំទ្រលើកទឹកចិត្តពួកយើង មិនថាពេលណា នៅកន្លែងណា ” ៕
នារសៀលថ្ងៃអង្គារ ទី ១០ ខែ វិច្ឆិកា ឆ្នាំ ២០២០នេះ សហព័ន្ធកីឡាបាល់ទាត់កម្ពុជា បានចេញសេចក្តីជូនដំណឹងស្តីអំពីការប្រកាសផ្អាកការប្រកួតកីឡាបាល់ទាត់ជាបណ្តោះអាសន្ន នៃការប្រកួតជម្រើសជើងឯកជាតិលីគទី២ ជម្រើសជើងឯកបាល់ទាត់នារី ពានរង្វាន់បាល់ទាត់ក្នុងសាល Tiger Futsal Cup និងជម្រើសជើងឯកយុវជនអាយុក្រោម ១៥ឆ្នាំ និង ១៨ឆ្នាំ ឆ្នាំ ២០២០ ដោយសារការឆ្លងជំងឺ COVID-19 នៅកម្ពុជា ពិសេសនៅក្នុងទីក្រុងភ្នំពេញនាពេលថ្មីៗនេះ។
តាមសេចក្តីជូនដំណឹងនេះផងដែរ សហព័ន្ធ មិនទាន់កំណត់ថ្ងៃដំណើរការប្រកួតឡើងវិញនៅឡើយទេ ដោយរង់ចាំរហូតមានការណែនាំពីក្រសួងអប់រំ យុវជន និងកីឡា ។
គួរឱ្យដឹងថា ក្រុមបាល់ទាត់នារីក្លិបបឹងកេត កំពុងដំណើរការប្រកួតក្នុងពានរង្វាន់ជម្រើសជើងឯកបាល់ទាត់នារី ដោយឆ្លងកាត់ការប្រកួតចំនួន ៦សប្តាហ៍កន្លងទៅ ទទួលបានលទ្ធផល ស្មើ៣ប្រកួត និងបរាជ័យ ៣ប្រកួត ។
រីចំណែកឯក្រុមយុវជនអាយុក្រោម ១៥ឆ្នាំ និង ១៨ឆ្នាំ របស់យើងក៏កំពុងត្រៀមលក្ខណៈដើម្បីចូលរួមប្រកួតពានរង្វាន់យុវជនរបស់សហព័ន្ធទាំង២កម្រិតដូចគ្នាផងដែរ បន្ទាប់ពីបានប្រមូលផ្តុំហ្វឹកហាត់ និងប្រកួតមិត្តភាពកន្លងមក៕
ក្រុមយុវជនអាយុក្រោម ១៥ឆ្នាំ បឹងកេត ស្ថិតនៅពូល ក រួមជាមួយ កំពង់ឆ្នាំង, កងយោធពលខេមរភូមិន្ទ, ព្រះខ័នរាជស្វាយរៀង និង ភ្នំពេញក្រោន រីឯ យុវជនអាយុក្រោម ១៨ឆ្នាំវិញ ស្ថិតនៅពូល ខ ជាមួយ ភ្នំពេញក្រោន, អាស៊ីអឺរ៉ុប, កងយោធពលខេមរភូមិន្ទ និង សាលាតម្រង់ទិសអភិវឌ្ឍន៍កណ្តាលភូមភាគខាងជើង ៕
[សេចក្តីប្រកាសព័ត៌មាន] ក្លិបបាល់ទាត់បឹងកេត មានកិត្តិយសសូមប្រកាសអំពីការតែងតាំងលោកគ្រូ គឹម ភក្តី ជាគ្រូបង្គោលផ្លូវការ ចាប់ពីពេលនេះតទៅ បន្ទាប់ពីលោកគ្រូបានដឹកនាំក្រុមទទួលបានលទ្ធផលយ៉ាងល្អក្នុងរដូវកាល ២០២០កន្លងទៅនេះ ។
លោក បែ មករា អគ្គលេខាធិការបស់ក្លិប បានបកស្រាយអំពីការតែងតាំងនេះថា៖ “ ជំនួសមុខឱ្យថ្នាក់ដឹកនាំក្លិប យើងពិតជាមានមោទកភាពចំពោះអ្វីដែលលោកគ្រូ ភក្តី បានធ្វើកន្លងមកជាមួយក្លិប ពិតណាស់គាត់បានដឹកនាំបឹងកេតឱ្យឈ្នះពានលីគកំពូលកម្ពុជា រដូវកាល ២០២០ និងជាលើកទី៤ក្នុងប្រវត្តិសាស្រ្តក្លិប ហើយមិនត្រឹមតែប៉ុណ្ណោះ ក្រោមការដឹកនាំរបស់គាត់ យើងបានបញ្ចប់រដូវកាលដោយមិនស្គាល់បរាជ័យទាល់តែសោះ ” ។
លោកបន្ថែមថា៖ “ ដោយមើលឃើញអំពីស្នាដៃរបស់គាត់ និងផែនការរៀបចំក្រុមរបស់គាត់ ស្របទៅតាមចក្ខុវិស័យរបស់ក្លិប ដែលផ្តោតទៅលើការអភិវឌ្ឍជាចម្បង ទើបយើងសម្រេចផ្តល់តួនាទីនេះទៅឱ្យគាត់ផ្លូវការតែម្តង ” ។
គួររំលឹកថា លោកគ្រូ គឹម ភក្តី បានចូលកាន់តួនាទីជាគ្រូបង្គោលបណ្តោះអាសន្ន ចាប់តាំងពីសប្តាហ៍ទី ៦ កន្លងមក ហើយបានឈ្នះពានគ្រូបង្វឹកឆ្នើមល្អដាច់គេ ប្រចាំខែ កក្កដា និង សីហា និងក្រសោបបានពានគ្រូបង្វឹកល្អជាងគេប្រចាំរដូវកាល ២០២០ថែមទៀតផង។
លើសពីនេះទៅទៀត លោក ក៏ធ្លាប់ស្ថិតក្នុងក្រុមការងារបច្ចេកទេស ដែលជួយឱ្យបឹងកេត គ្រងជើងឯកពានរង្វាន់សម្តេចតេជោ ហ៊ុន សែន ជាលើកដំបូងក្នុងប្រវត្តិសាស្រ្តក្លិបទៀតផង កាលពីឆ្នាំ ២០១៩ ដែលលោកបានចូលមកបំពេញការងារនៅទីនេះ៕
លោកគ្រូ គង់ ចន្ថា គ្រូបង្គោលនៃក្រុមយុវជនបឹងកេត អាយុក្រោម ១៥ឆ្នាំ បានសម្តែងអារម្មណ៍រំភើប ក្រោយពីទទួលបានឱកាសដឹកនាំក្រុម ចូលរួមប្រកួតក្នុងពានរង្វាន់បាល់ទាត់យុវជន ដែលរៀបចំឡើងដោយសហព័ន្ធកីឡាបាល់ទាត់កម្ពុជា ប្រចាំរដូវកាល ២០២០-២០២១នេះ។
ថ្លែងប្រាប់ក្រុមការងារព័ត៌មានរបស់គេហទំព័រក្លិប boeungketfc.com គ្រូបង្វឹកកាន់អជ្ញាបណ្ឌ C របស់ AFC រូបនេះនិយាយថា៖ “ ជាដំបូងខ្ញុំមានអារម្មណ៍ថា សប្បាយរីករាយ ដែលក្លិបបានផ្តល់ឱកាសឱ្យមកដឹកនាំក្រុមបឹងកេត U15 ដែលទើបនឹងបង្កើតឡើងក្នុងឆ្នាំនេះ ” ។
លោកបន្តថា៖ “ ទោះបីពួកយើងទើបបង្កើតថ្មីពិតមែន ប៉ុន្តែយើងបានត្រៀមលក្ខណៈរួចរាល់ហើយ ព្រោះក្នុងការប្រមូលផ្តុំហ្វឹកហាត់កន្លងមក កីឡាកររបស់យើងទាំងអស់បានបង្ហាញឆន្ទៈចង់ប្រកួត និងខិតខំប្រឹងហ្វឹកហាត់ ” ។
អតីតគ្រូជំនួយរបស់ក្រុមយុវជនអាយុក្រោម ១៨ឆ្នាំ បង្ហាញអំពីមហិច្ឆតារបស់ខ្លួនក្នុងឆ្នាំដំបូងដែលដឹកនាំក្រុមយុវជនអាយុក្រោម ១៥ឆ្នាំបឹងកេតថា៖ “ ចំពោះគោលដៅក្នុងពានរង្វាន់យុវជននេះ ខ្ញុំចង់ធ្វើឱ្យបានលទ្ធផលល្អ បើសិនជាអាចគឺឱ្យដល់វគ្គផ្តាច់ព្រ័ត្រ ឬលេខ១ កាន់តែល្អ ប៉ុន្តែយើងក៏មិនរំពឹងខ្ពស់ពេកនោះដែរ តែយើងនឹងខំឱ្យអស់ពីលទ្ធភាព ” ។
មិនត្រឹមតែប៉ុណ្ណោះ លោកគ្រូ ចន្ថា ចង់ឃើញយុវជនរបស់ខ្លួន មានឱកាសបង្ហាញសមត្ថភាព មានការអភិវឌ្ឍ ព្រោះថាសម្រាប់ថ្នាលយុវជន រឿងដែលសំខាន់ជាងលទ្ធផលនោះគឺការអភិវឌ្ឍ ។
សូមបញ្ជាក់ថា យុវជនបឹងកេត ស្ថិតនៅក្នុងពូល ក ជាមួយយុវជនសាលាតម្រង់ទិសខេត្តកំពង់ឆ្នាំង, យុវជនកងយោធពលខេមរភូមិន្ទ, យុវជនភ្នំពេញក្រោន និងយុវជន ព្រះខ័នរាជស្វាយរៀង ។
“ ខ្ញុំយល់ថាពូលរបស់យើងគឺសុទ្ធតែក្រុមខ្លាំង និងមួយវិញទៀត យុវជនរបស់ពួកគេសុទ្ធតែមានបទពិសោធន៍ច្រើនជាងយើងដែលទើបបង្កើតថ្មី តួរយ៉ាងដូចយុវជនភ្នំពេញក្រោន និងក្រុមផ្សេងៗទៀត អញ្ចឹងគឺវាមិនងាយស្រួលនោះទេសម្រាប់យើងក្នុងការរកពិន្ទុក្នុងពូល ប៉ុន្តែពួកយើងនឹងខំប្រឹងយកជ័យជម្នះឱ្យបាន ” លោក គង់ ចន្ធា បានលើកឡើង ។
ខាងក្រោមគឺជាកាលវិភាគប្រកួតរបស់ក្រុមយុវជនអាយុក្រោម ១៥ឆ្នាំ ក្នុងពានរង្វាន់សហព័ន្ធ រដូវកាល ២០២០-២០២១៖